Жанымда жүрші....

Жанымда жүрші, жігерімді құлатпа,
Жырым боп еніп, жадымда менің тұрақта.
Күйкі тірліктен көңіл түскенде құлазып,
Ештеңе деме, жай ғана мені құшақта!
Бойымнан кейде жат қылық көрсең ұнатпа,
Қолдауың менен ақылың тұрар құлақта.
Жаңылып, кейде артық кететін кездерде,
Сөгуден бұрын, жай ғана мені құшақта!
Қаншама жұп бар, жүрегі іштей жырақта,
Бір-бірін даттап сүрініп жатады, құлап та.
Дауыл ма мейлі, боран соқса да көңілде,
Жаныма кел де, жай ғана мені құшақта.
Нәзіктеу шығар болмысым бөтен, бірақ та,
Өзіңе сенем, түсірмейді деп тұзаққа.
Кейбіреу мені аласартқысы келгенде,
Тезірек кел де, жай ғана мені құшақта!
Бұралаң жолдар шыңдайды бізді сынақта,
Үміттің нәзік білтесі жансын шырақта.
Өмірдің әрбір сәтті де, сәтсіз кешінде,
Жанымда бол да, жай ғана мені құшақта!

---