Махаббат үйленген соң басталады

Махаббат үйленген соң басталады,
Татулық қиындықты басқарады.
Сыйласып, сабыр еткен жұптар ғана -
Қарттықты қарсы алуға аттанады..

Махаббат - ақ отаудың шамшырағы,
Үлкеннің ақ батасы, ар тұрағы.
"Ұзағынан болғай" - деп, бұл қуаныш,
Аналардың көзіне жас тұнады.

Махаббат​ - құдалардың татулығы,
Жастарға басу айтқан, ақыл үні.
Жас отаудың түтінін түзететін​ -
Туыстардың риясыз жақындығы.

Пәк махаббат баршаға тілейін мен,
Құт, бақыт келсін үйге ақ келінмен.
Мың шүкірлік айтамыз, Жаратқанға,
Біздерге дәл сіздердей құда берген!

Гүлмекен Қасенбай
11.11.2021

---