Наурыз батасы – Қожаберген жырау

Мұсылманда жылдың басы-наурыз айы,
Айтылған тауарихта оның жайы.
Зымыстан қыстың күнін түріп тастап,
Наурыз келсе, шаттанар жарлы-байы.

Халайық тез серпіліп, өңі кірер,
Шаруасы талапты ердің өрлей берер.
Ұлыстың ұлы күні жайлы болып,
Құдайым Алаш жұртын қолдап жүрер!

Қазағым, наурыз айың құтты болсын,
Малдарың аман төлдеп, сүтті болсын.
Ағайын әрқашанда қоғамдасы,
Өзара ылғи тату-тәтті болсын!

Көз жасы жетім-жесір ие берсін,
Ұлыс күні дәулетті үйе берсін.
Есіркеп ғарыптерді қадыр Алла,
Оларға бие менен түйе берсін!

Әлеумет, бақ орнатсын наурыз айы,
Оңды боп ел-жұртымның хал-жағдайы.
Қар кетіп, жер қарайып, күн жылынды,
Әр үйдің ойнақтасын тайлақ-тайы.