Әйелдің ақын болғаны

Әйелдің ақын болғаны


Әйелдің ақын болғаны азап екен ғой?
Жыр қысса жаза алмай төгіп,
Мазақ етеді ой.
Бітпейтін тіршілік қамы жүндей түткенде,
Жалғыздық аралына бір тартар бөтен ой.

Әйелдің ақын болғаны ойға сыймайды,
Шумақтар лықсып төгіліп "жаз" деп қинайды.
"Бітпейтін қонақтар менен елден тығылып,
Оңаша қалайықшы?" - деп шабытың жылайды...

Әйелің ақын болса егер, күң қыла көрме,
Елемей азап отына жандыра берме.
Қоғамның бір кірпіші боп, қалансын ол да,
Әйелдің жіңішке жолын тар қыла берме!

Әйелдің ақын болғаны өзгеше сынақ,
Үп етсе өмір дауылы бойы қалтырап.
Қаламын тірек етуге барын салады,
Сиясын жыр өзеніне бір батырып-ап!

Әйелдің ақын болғаны ерекше бақыт,
Жазуға жетпесе-дағы сағымдай уақыт.
Көңілі сәбидей таза, аңғал келеді,
Жүреді айналасына тек шуақ шашып!

Гүлмекен Қасенбай
14.09.2025

---