Пайғамбарды сағынғанда

Пайғамбарды сағынғанда


Я, РасулуЛлаһ!
Сізді сағындым!
Арманым бір көру, жүзіңді лағыл нұр.
Мейірімге шөлдесем Өзіңді ойладым,
Қатыгез қоғамда қиналса жаным бір.

Шіркін-ай тумаппын сізбен бір уақытта,
Румайса анадай барушы ем жаныңа.
Сан түрлі сұрақтар жаудырып үнемі,
Жүрер ме ем дайын боп хадистер жазуға.

Ухуд пен Бәдірге бірге еріп барар ма ем?
Түнімен оқ жонып, сауыттар жамар ма ем?
Хандақта қылыш ап, ерлерше киініп -
Сафия анадай дұшпанды шабар ма ем?

Табукке жаяулап ерер ме ем соңыңнан,
Абу Зарр атадай адаспай жолымнан.
Каъб ибн Маликтей шын тәубе етер ме ем,
Күнәлі істерге абайсыз жолықсам...

"Ақаба антына" барар ма ем ілесіп,
Шын байғат берер ме ем, дін үшін күресіп.
Айша ана жазықсыз кінәлі болғанда,
Қорғар ма ем сөзбенен, ибн Салюльмен тіресіп.

Зайд ибн Сәбиттей ғұлама болар ма ем,
Құранды тері мен ағашқа жазар ма ем?
Үбай ибн Каъбтай білімді адам боп,
Перденің артында мол ілім алар ма ем...

Мың алғыс Сіз жайлы Сираны жеткізген,
Нұрсұлтан ініме, жүз сабақ өткізген.
Әр дәріс - Құран мен хадистің тәпсірі,
Пайғамбар өмірі - нұсқаулық сүннетке.

Дәріске қатысқан мың алғыс қыздарға,
Кіруді бұйыртсын Аллаһым Жәннатқа.
Білім - бұл шамшырақ, ерінбей алайық,
Ұялып қалмайық Бақиға барғанда!

Гүлмекен Қасенбайқызы
12.12.2025

---