Байқа әйелден – Гүлмекен Қасенбай

Байқа әйелден

Әйел адам - сезімдерден тұрады,
Оңай оның күлуі де, жылауы...
Әйел сүйсе көкірегіңді көтерме,
Бар оның әр көз жасының сұрауы!

Таптама арын, мазақтама, қорлама,
Зина жасап, Қияметте сорлама..
Шайтан сені ғажап қылып көрсетті,
Шын бейнеңді көрмей тұр ол бейшара.

"Ғашық маған" деп ойлама қыз біткен,
Әр сөзіңе "азапты от" бар үздіккен.
Бетпердеңді алып бір күн жаныңа -
Үңілгенде... қаласың тек шындықпен!

Көп мақтанба сырт бейнеңе тартымды,
Жаратқанның бұйрығымен бұл түрді.
Ядро мен жасушалар құраған -
Күнә істеуге жаратпаған тәніңді.

Тәубесізді тазартады от қана,
Зина жасап, ұрлық істеп, қорықпасаң.
Мазақ етіп, күлген жанның талайы -
Қабірінде-ақ өкіруде азаптан...

Аз уақытқа жерге келген қонақсың,
Біле тұра неге ақылға шолақсың?!
Әрбір әйел саған келген зор сынақ,
Тосатұғын ақ жолынан Жәннаттың!

Тақуаның ең мықтысында сабыр бар,
Тікензарда жүргендей жай адымдар.
Жарына - адал, жақсы мәміле қылғанға,
Дінге берік, пәк, адал жар табылар!

Байқа жігіт - басқа пәле әйелден,
Бақытты өмір сүруің де әйелмен.
Бей-берекет төге берсең көз жасын,
Жалғыздықта қоштасасың әлеммен!

Гүлмекен Қасенбай
23.12.2025