Болсам-ау – Сырбай Мәуленов

(Қырғыз әуенімен)
Ақсақалды атаның
Ақ батасы болсам-ау.
Ақ жаулықты ананың
Ақ ботасы болсам-ау.
Көктем күні тасыған
Шу өзені болсам-ау.
Бұлт кетпеген басынан
Қырғыз тауға қонсам-ау.
Қолдан таңды атырып,
Күнмен бірге ақсам-ау.
Айды бірге батырып,
Аймен бірге жатсам-ау.
Бұрхан дария су кешіп,
Өткелдерден өтсем-ау.
Жолбарысты ну кешіп,
Сүйгеніме жетсем-ау.
* * *
Көкшенің көк аспандай таулары бар,
Қолыңнан келсе, қозғап аударып ал.
Құяды көк торғын бұлт жаңбыр жасын,
Атаның сонда аппақ арманы бар.
Басынан жаз өтеді, күз өтеді,
Жатады мәңгі жас боп құз етегі.
Қиқулап қыран құстар төбесінде
Көкшені күндіз-түні күзетеді.
Созылып етегінде жатыр дала,
Көлдермен күңіренген ақын дала,
Толқыған егінменен,
Қарағайдан
Көтерген көк найзасын батыр дала.
Алыстан ансап мейман келіп жетсе,
Ақысыз тартар күнін көңіл етсе.
Табиғат сұлулығын қайталамай
Тұр оқшау жаны жомарт, сері Көкше.