Есіл

Толқыны тулап жарды ұрып,
Көбігін көкке атпаған.
Жапанда гүрлеп жаңғырып,
Жосыла жеңкіп жатпаған.
Сабырмен тыңдап ел демін,
Сабырмен алға аттаған.
Сан ғасыр салған өрнегін,
Сар дала сырын сақтаған.
Қазына толы қолтығы
Келеді дәннен арылмай.
Момақан аққан толқыны
Салмақты қазақ жанындай.
Шомғандай терең бір ойға
Жатады-ау кейде мөлдіреп.
Таралып сонда жыр бойға
Тұрарсың сен де елжіреп.

1961.