Өлең, жыр, ақындар

Күзгі көрініс

  • 08.04.2017
  • 0
  • 1
  • 44664
Көңілді қоңыр салқын саз жүдетіп,
Көз жетті кеткеніне жаздың өтіп.
Құлайды жапырақтар құба талдан,
Күрең күз құдіретіне тағзым етіп.

Кеші еді солқылдаған күздің суық,
Не шара, жасыл жаздан үздірсе үміт?
Базары тарқап кеткен бақ ішінде
Күтіп тұр әлдекімді Қыз күрсініп.

Жас талдың аптыққан жел есін алды,
Құрғырдың қылығы жоқ еш ұнамды.
Жылаған жапырақтың жетім күйі,
Әп сәтте көңіліме көшіп алды.

Арқаның өңменімнен өтті желі,
Күдерін қайтқан құстан көк те үзеді,
Бозбауыр бала бұлттар боздап тұрып,
Бораған қыстан хабар жеткізеді.

Бәлкім бұл кездесу ме тұңғыш, ап-пақ,
Бақтағы қыз да сабыр тұрды сақтап.
...Бір жігіт сұр көшеге көрік беріп,
Келеді қызыл-жасыл гүл құшақтап.

Елемей қырды гүлсіз, күнді нұрсыз,
Кездесіп тұрды екеуі. ...Тұрмын үнсіз.
Батырған мені мұңға қоңыр Күз бен
Жігіттің қолындағы гүл ғұмырсыз...



Пікірлер (1)

Шакизат

Өлеңдері қандай ойлы еді!Сезінген жанның жанымен астасып біте қайнасқандай, керемет!Ақиық Мұқағалиды,маңдайы кереқарыс Маралтайды құмарта оқып мұңайсам көңіліме медет , қиналсам жұбаныш табатын едім.Енді міне менің сүйікті ақындарым тағы бір есім мен толықты.Аллаға мың қайтара шүкір мақтан тұтар Ұл-қыздары барына тəубе,тəубе!

Пікір қалдырыңыз

Бұл өмір...

  • 0
  • 3

Бұл өмір қысқа, құстың тұмсығындай,
Жастығың жара бермес бүршік ыңғай.
Өкініп өткен күнге өксігенмен,
Жуарсың көңіліңнің кіршігін қай?

Толық

* * *

  • 0
  • 0

Жұлдыздардың жалынына Түн балқып,
Балбырайды, құшағында мұң қалқып
Сені еске сап айлы аспанның демінен,
Жұпар сезім тұрды аңқып.

Толық

Тамшы-тағдыр

  • 0
  • 1

Алматы. Жып-жылы жаңбыры
Жанына ол қыздың ұнайтын.
Ал оның тағдыры, жан-мұңы
Жарысып жаңбырмен жылайтын.

Толық

Қарап көріңіз