Шетелге сатылған сәбиге

Қандасым-ай, қамкөңіл бауырым-ай,
Өзіңмен қоштасудың ауырын-ай.
Қайда жүрсең аман болса, пәк сәбиім,
Жалғыздың әрқашан да жары құдай.

Тастанды едің, тастаған анаң қиып,
Зарлатқан тумай жатып заман-күйік.
Ақшасы көп шет елдік алып жатыр,
Елімнен жетім қалған адам жиып.

Сен-дағы кетесің-ау, жат бауыр боп,
Тастанды болғаннан соң тас бауыр боп.
Қайыршы тірлікке бұл не істей алам,
Жұқалтаң қаймағынан қаспағы көп.

Ұмытарсың тіліңді, дініңді де,
Өмірің де ұқсамас бүгінгіге.
Түрің қазақ болғанмен сырың басқа,
Өзге жақтан аларсың білімді де.

Қандасым-ай, қамкөңіл бауырым-ай,
Өзіңмен қоштасудың ауырын-ай.
Қайда жүрсең аман болса, пәк сәбиім,
Жалғыздың әрқашан да жары құдай.

---