Күйім менің – Абдулла Сакимбай

Биік еді, әрқашан киелі еді,
Тәнті қылған қазақтың күй өнері.
Мен әркез биік ұстап өзге өнерден
Өнеге өлшемімен сүйем оны.

Шанағынан күй төккен домбыра көп,
Құмарына көңілдің қондыра кеп.
Қазына жоқ ешкімде күйден асқан
Ешкімде күйден сқан мол мұра жоқ.

Тұрғандай тағдыр жолы қылда тегі,
Сазына бөлейтұғын сырға толы.
Сары далаға тәтті мұң сыйлап өткен
Қорқыттың қобызы да қымбат еді.

Дина тартқан тағылым, өнегемен,
Құрманғазы күй қылған терең өлең.
Күйдің биік тұғыры шаңырақтан,
Кең және келешегі керегеден.

«Жайлауым» жарты әлемде төркіні кең,
«Арманмен» астарласқан көркі білем.
«Сарыарқаны» сағымдай желпіп өткен
Күйім менің «Көңілдің толқынымен».

Қара қылды қақ жарған қиын жерін,
Толтырған тоқсан сөз де түйінге мұң.
Сазынан сыр ағылған сыйым менің,
Бабамнан мұра болған күйім менің.