Автобуста

Жетіде автобусқа мінемін де,
Төрдегі жайғасамын орыныма.
Қараңғы болса да әлі.
Жүрегімде,
Жатталған Атыраудың жолы мына.

Шөпір де шоқалақты жаттап алып,
Аяғы педальдардан жаңылмайды.
Әр жерден адамдарды тоқтап алып,
Автобус бірер минут дамылдайды.

Жол ұзақ болғанымен, бағыт анық,
Газыңды көлік жоқта бас шамалы.
-Тиегін әңгіменің ағытайық,
Мінген жоқ автобусқа жастар әлі.

Үй иесі жуас болса төріндегі,
Көргенбіз алатынын қонақ билеп.
Дәурені қазақ тілдің бүгіндері,
Созылар әрі кетсе он-ақ минут!

Дәурені он-ақ минут! Осы бәрі,
Қоямыз осы арадан нүктені біз.
Ары қарай орыс тілі жосылады.
Жастардан осы ма еді күткеніміз.

Білемін сайрап тұр ғой көкірегің,
Озарсың орыстардан жарыс болса.
Қазақша сөйлеңдерші өтінемін,
Кеудеңде жылт еткен бір намыс болса!

---