"ҚазҰУ – менің өмірімдегі үлкен мүмкіндіктердің бастауы"

"ҚазҰУ – менің кәсіби жолымның негізі"

Кәрім Оралбек Сәрсенбайұлы, ғылыми қызметкер, магистрант

Әл-Фараби атындағы Қазақ ұлттық университеті менің өмірімде өте маңызды орын алады. 2018 жылы Тарих факультетінің «Музей ісі және ескерткіштерді қорғау» мамандығына түскен сәттен бастап, бұл білім ордасы менің тұлғалық және кәсіби дамуыма үлкен әсер етті.

ҚазҰУ-ға алғашқы қадамымды жасай отырып, мен өзімнің білім алу жолымды, яғни музей ісі мен ескерткіштерді қорғау саласындағы қызметімді тереңірек зерттей бастадым. Университеттегі ұстаздарым тек жоғары білім беріп қана қоймай, ғылым мен тарихқа деген құштарлықты арттырды. Әрбір дәріс, әрбір ғылыми жұмыс менің болашақ маман ретінде қалыптасуыма үлкен септігін тигізді.

ҚазҰУ мені тәжірибелі ұстаздармен, ғылым мен зерттеулерге деген жаңа көзқараспен таныстырды. Музей ісі мен тарихи ескерткіштерді қорғау саласында алған білім мен дағдылар мені бүгінгі таңда Қазақстан Республикасы Мемлекеттік орталық музейінде ғылыми қызметкер ретінде жұмыс істеуге жетеледі. Мұнда мен еліміздің мәдени мұрасын зерттеп, сақтауға бағытталған маңызды жобаларда жұмыс істеп жүрмін.

Қазіргі таңда мен «Педагогикалық тарих» мамандығы бойынша ҚазҰУ-дың магистратурасында білім алудамын. Университет қабырғасында жинаған тәжірибе мен алған білімім менің ғылыми жұмыстарымды одан әрі тереңдетіп, зерттеулеріме жаңа бағыттар ашты.

Менің кәсіби жолымда ең үлкен жетістіктерімнің бірі – ҚазҰУ-да білім алғаным. Университет мені тек біліммен емес, өз мамандығыма деген сүйіспеншілікпен де байытты. Қазір мен өзімді сенімді әрі болашаққа дайын маман ретінде сезінемін.

Мен әрқашан мақтанышпен айтамын: Мен – ҚазҰУ түлегімін!