«Дінтану мамандығының маңыздылығы»

Қазіргі жаһандану кезеңінде діннің қоғам өміріндегі рөлі ерекше мәнге ие болып келеді.Әлемдік және ұлттық діндердің өзара ықпалдастығы, діни сана мен діни практикадағы өзгерістер, дінаралық қатынастардың күрделене бастауына байланысты дінге деген ғылыми көзқарастың қажеттілігі артып келеді.Бұл жағдайда дінге тек сенім мен ғибадат ретінде емес, кең ауқымда әлеуметтік, тарихи және мәдени құбылыс ретінде қарай алатын білікті мамандардың жеткілікті болуы өте маңызды.Осы тұрғыда дінтану мамандығының маңызы айрықша.

   Дінтану мамандығы-дінді ғылыми негізде, бейтарап көзқараспен зерттейтін сала.Бұл мамандықты меңгеруші діндердің пайда болуы мен дамуын, олардың қоғамдағы орны мен қызметін, әртүрлі діндердің ерекшеліктері мен ортақ ұстанымдарын салыстыра отырып талдайды.Дінтанушы діни құбылыстарды философиялық, тарихи, мәдени және әлеуметтік тұрғыдан зерделей алады.Бұл-кез келген қоғам үшін аса қажет қабілет, себебі діни сауаттылық пен рухани толеранттылық қоғамның тұрақтылығы үшін маңызды.

  Қазақстан секілді көпэтносты және көпконфессиялы мемлекетте дінтанушы мамандарға деген сұраныс әр жыл сайын артып келеді.Еліміздің ішіндегі дінаралық және ұлтаралық келісімді нығайту, экстремизм мен радикализмге қарсы күресу, жастар арасында жалған діни ағымдардың ықпалын азайту сияқты өзекті мәселелер - кәсіби дінтанушылардың қатысуынсыз шешілуі қиын.Олар мемлекеттік мекемелерде, ішкі саясат және дін істері басқармаларында, білім беру саласында ғылыми зерттеу орталықтарында, бұқаралық ақпарат құралдарында және қоғамдық ұйымдарда жемісті еңбек ете алады.

 Дінтанушы мамандығы сонымен қатар мәдениет пен өркениетті тереңірек түсінуге жол ашады. Адамзат тарихында дін тек сенім мен рәсімдер жиынтығы болып қоймай, философиялық идеялардың, көркем өнердің, моральдық ұстанымдардың, заң жүйелерінің қалыптасуына үлкен ықпал еткен. Дінтанушы осы тарихи-мәдени сабақтастықты зерттеп, оны қазіргі қоғамға бейімдеп жеткізе алады. Бұл әсіресе жас ұрпақтың рухани тәрбиесі мен мәдени санасын қалыптастыруда маңызды.

  Бүгінгі таңда ақпараттың молдығы мен қолжетімділігі дін туралы жалған немесе бұрмаланған түсініктердің кең таралуына да жол ашты. Әлеуметтік желілер мен бейресми дереккөздерде діни білімнің орнына пікірлер мен манипуляциялар үстемдік құрып отырған жағдайда, нақты ғылыми білімге сүйенген дінтанушы мамандардың рөлі арта түседі. Олар қоғамдағы діни сауаттылықты көтеріп қана қоймай, адамдар арасында түсіністік пен құрметті орнықтыруға ықпал етеді.

  Сонымен қатар, дінтану – жастар үшін үлкен мүмкіндіктер ұсынатын болашақ мамандық. Бұл салада ғылыми ізденіске, шетелдік тәжірибемен танысуға, халықаралық форумдар мен конференцияларға қатысуға жол ашық. Дінтану мамандығын меңгерген жас маман тек отандық кеңістікте емес, жаһандық деңгейде де өз білімін қолдана алады. Себебі діни мәселелер бүгінде тек рухани салада ғана емес, саясат, халықаралық қатынастар, мәдениетаралық диалог секілді салаларда да маңызды орын алады.

   Қорыта айтқанда, дінтану мамандығы – қазіргі қоғамның сұранысына сай, өзекті де қажетті мамандықтардың бірі. Ол – тек кәсіби бағыт емес, рухани жауапкершілігі мол жол. Дінтанушы болу – тек білім жинау емес, халық пен ел болашағы үшін қызмет ету, мәдениет пен руханиятты ұштастыра отырып, қоғамның тұтастығын нығайтуға үлес қосу. Сондықтан бұл мамандықты таңдау – елге, ұлтқа, болашаққа деген шынайы жанашырлықтың белгісі.

                               Жетекші: Ж. У. Кантарбаева,

филос.ғ.к., әл-Фараби атындағы Қазақ ұлттық университеті «Дінтану және мәдениеттану » кафедрасының доценті

                                          Автор:А.А.Сакеновна,

әл-Фараби атындағы Қазақ ұлттық университеті «Дінтану» мамандығының  1 курс студенті

Әлеуметтік желілерде бөлісіңіз: