Өлең, жыр, ақындар

Көкше таңы

  • 22.05.2019
  • 0
  • 0
  • 1873
Таң ата көрдің бе сен Көкшетауды,
Дейтіндей бұлтсыз аспан жұпар жауды,
Хош иіс жан-жағыңды қоршап алып,
Секілді ақ шымылдық қыздың аулы.
Көтеріп самал саусақ сәл билетіп,
Сәбидей құшағында әлдилетіп,
Көлденең көк бесікке бөлеп салып,
Көрмеген рахатқа жаныңды ертіп.
Жарықтық әкетеді-ау есінді алып,
Таулардың көкше мұнар көшін бағып,
Солармен қалқып қатар ұшқандайсың
Құс болып, адам деген есім қалып.
Бәрі — көк, жерің де — көк, көгің де көк
Орманың, көлің де - көк, шөбің де көк.
Теп-тегіс көк дүниенің ортасында
Сенің де көк болмасқа жөнің де жоқ.
Ақ таңның аясында Көкшені кер,
Арудың алпысы айдын, сексені көл.
Аспанның жерге түскен балалары
Секілді, сәл тұрады-ау сескеніп ол.
Ал сонда алтын табақ күн дөңгелеп,
Көргендей нақ туысын көл еркелеп.
Сағынып, шопылдасып сүйіскендей
Сүйкімді құлағыңа бір үн келед.
Басында Көкшетаудың күн тыныстап,
«Демалып жатайыншы бір дұрыстап!»
Дегендей көк кемерге көп бөгеліп,
Тұрады ұзақ балқып, тым-тырыс қап.
Көк бұлттан жарастырып бөркін киіп,
Денесі Көкшетауға еркін тиіп,
Есіл күн ерке қыздай тұрар бір сәт
Ернінің ұшыменен ептеп сүйіп. —
Содан соң есін жиып рахаттан,
«Ал, жолым, енді көктен жыраққа аттан!-
Дегендей қызыл күйме, күрең атпен
Күн сері жез қоңырау сыңғырлатқан.
Ал, Көкше, жаңғырыққан көк сарайдай,
Тұрады сол дыбыстан босай алмай.
Айналып шыға алмайсың құшағынан
Сен-дағы бақыт тапқан босағандай.
Таң ата Көкшетаудың сәнін көр сен,
Сары ала самсай біткен дәнін көр сен.
Кетесің тау Көкшеге тәрік қылып
Қызықтың өзге керген бәрін де сен.
Тау Көкше, тамаша едің не деген сен,
Осы күй, осы түрмен кеудеме енсең,
Көтеріп, Көкшетаудай жақсы өлкемді
Арман жоқ жер бетімен дөңгеленсем!



Пікірлер (0)

Пікір қалдырыңыз

Ұстазбен сырласу

  • 0
  • 4

Қаншама рет қалам тартсам қасымда,
Сен тұрасың жүрегімнің басында,
Сен өзімнің өміріме кіргенсің
Сонау-сонау сегіз-тоғыз жасымда.

Толық

Киік

  • 0
  • 0

Қолға түспей қырын қашқан бір киік,
Сені көріп жүрек шіркін жүр күйіп.
Саған асыл соқтым тұғыр кеудемнен
Тұршы сонда, төмендемей, тұр биік.

Толық

Алматыға келіп-кетіп тұрыңдар

  • 0
  • 0

Алматыда жазылмаған жырым бар,
Алматыда айтылмаған сырым бар,
Мен қазақпын, маған туыс дегендер
Алматыға келіп-кетіп тұрындар.

Толық

Қарап көріңіз