Сағынамын достарды

(ән)

Жетім байғұс — жеке гүл,
Қол батырмас қос терек,
Болмаған соң екі өмір,
Бір өмірге дос керек.
Сағынамын достарды
Сағынғандай күн көзін,
Сағынғандай аспанды
Оның мөлдір күмбезін.
Сағынамын достарды
Сағынғандай көктемді,
Сәукелелі жас талды,
Сағым көшкен бөктерді.
Сағынамын достарды
Көл сағынған бұлақтай,
Сағынамын достарды
Жел сағынған құрақтай.
Сағынамын достарды
Татулық пен бірліктей,
Сағынамын достарды
Мәңгі тәтті тірліктей.
Жетім байғұс — жеке гүл,
Қол батырмас қос терек,
Болмаған соң екі өмір,
Бір өмірге дос керек.

---