Жазғытұрым

Жазғытұрым, жайнап тағы келдің сен,
Тіршіліктің неткен ғажап белгісі ең!
Дегізесің дерттен дене босатып,
«Жер бетінде ұзақ жасап, көп жүрсем!»
Бәрі балғын, бәрі жаңа жан-жағың
Сезінбейсің ешбір жүктің салмағын.
Бойың сергек, ойың ұшқыр, қиял тез,
Өз еркіңде не қиялға бармағың.
Ауа-жұпар жас баланың исіндей,
Қалай жаның тұрар шыдап сүйсінбей.
Сиқыр санат алып сені ұшқандай
Көңіліңді әсте төмен түсірмей.
Жазғытұрым, жақсы-ақ едің сен неткен
Гүл бесікте тіршілікті тербеткен.
Жел сыбырлап, күн күркіреп оятып,
Әр сәбиің ә дегенше ер жеткен.
Жасарта бер, жаңарта бер, туғызып,
Жығылғанды аяғынан тұрғызып.
Сендей жомарт, жарылқағыш, көгерткіш
Біздің де алда келе жатыр күн қызық.

---