Үшарал

«Үшарал — жерім-ай,
Сауықшыл сайран, елім-ай»
Халық әні

Тасып кеп таудан түскен тек,
Тасырда-тұсыр тасты айдап.
Алакөлді аңсап үш Тентек,
Ағалап барып бас қоймақ.
Тоғысқан сол бір пұшпақта
Ететін бүгін ел мекен.
«Шалқайып басы үш жаққа
Үшарал қалған» дейді екен.
Жайлайтын елі жаз тауып,
Ежелден шұрай — құт табан.
Жағалай құрақ сыздауыт
Байласа бие шықпаған.
Алакөл саба сол жағы,
Он жақтан таулар төніскен.
Табиғат берген олжаны,
Тапжылмай жатып бөліскен.
Жер екен жайсаң Үшарал,
Елі жомарт өскен бай.
Әлемді мейлің үш орал,
Табыла бермес жер сондай.

---