Туған жер

Туған жерім – бесігім,
Күн нұрына бөленген.
Қандай ыстық есімің?
Аңсап сені келем мен.
Жасыл жайлау белдерің
Гүлдерімен тербелген.
Айдын шалқар көлдерің
Кең далама өң берген.
Мөлдіреген бұлағың
Ішсе, мейір қандырған.
Домбырамның құлағын
Күмбірлетіп, ән қылған.
Самал желің есілген
Аймалайды тәнімді.
Байтақ далаң көсілген,
Аялайды әнімді.
Бақыттымын мен аса
Туған жердің төсінде.
Туған жерім болмаса,
Болмас едім өзім де.
Туған жердей жерімді
Қайдан іздеп табамын?
Егеменді елімді
Шырқап әнге саламын.

---