Ананың ақылы

Ақылымды айтайын ұлым саған,
Жалғанда жалған айтпас ұғыншы, анаң.
Өмірде ең бірінші болу үшін -
Иманын баптау керек бірінші адам.

Азаттыққа ұмтыл əр кез, Азатбегім,
Тегіңді біл, ұмытпаған қазақ тегін.
Ел алдында абыройлы ер атанып,
Еңбекпенен төгілсін таза, ақ терің.

Берілме бұл жалғанның үніне тым,
Адам болма байлыққа үңілетін.
Өмірде өткіншіні алып тұрып,
Береді Алла таусылмайтын нығыметін.

Талабың көкке жетсін таудан да асып,
Əрқашан шындық дейтін заңғарға шық.
Бұл жалғанда жерде өмір сүргеніңмен,
Адалдықпен аспандағы арманға асық.

Бақыт пенен байлыққа теңерім сен,
Өмірдегі үмітім мен сенерім сен.
Басқалардан озғаның, адамдардың
Жанарынан пəк жүрегін көре білсең.

Елі үшін мініп жүріп атқа бабам,
Сырттағы жауларына сақ қараған.
Анаңның ақылына құлақ асып,
Халқыңның зор үмітін ақта балам.

---