Біздің ауыл шалғайда, жер түбінде

Біздің ауыл шалғайда, жер түбінде,
Бөлек біздің ауылдың дерті мүлде.
Бір сапарға шығып ем он үшімде,
Енді мына тағдырдың еркі кімде?
Ауыл қалды шалғайда, жер түбінде.

Қайрылуға қайран жоқ,барам ұзап,
Жолдас болдым жандарға жанары жат.
Ішіп жүрген суымның бәрі– кермек,
Жұтып жүрген ауамның бәрі– аңызақ,
Қайрылуға қайран жоқ, барам ұзап.

Ұзап барам, қайтейін, барған сайын,
Қанша жылым бар енді, бар қанша айым?
Бәйтеректің басымын тамырынан
Алыстайтын– жапырақ жарған сайын...

---