Токиодағы жекпе жек

Бастер Дуглас
Бокста көп байқалмай,
Жүруші еді,
Шешуші сөз айта алмай,
Токионың төріндегі рингте,
Төбелесті
Тайсонменен тайсалмай!
Қыран құстай
Жая алмаған қанатын,
Оза шаппай,
Көлеңкеде қалатын,
Дәу болғанмен,
Жұмсақ еді жігерсіз,
Жеңісті де
Қолдан бере салатын!
Не бір мықты жеңе алмаған
Майкты,
Жеймін десе,
Джеймісің айыпты,
Тәртіп солай,
Шықты Тайсон амалсыз,
Қарсыласы
Қалмаған соң лайықты!
Тірі жанға
Жібермеген есесін,
Бір ұрғанда
Қабырғаны тесетін,
Жиырма жаста
Чемпион боп әлемге,
Бәрін жеңген,
Кездессе де неше сын.
Жолбарыстай
Жылдам ұра салатын,
Дауыл күнгі
Өрттей лаулап жанатын,
Сарт еткенде
Найзағайдай апперкот,
Атан түйе
Аударылып қалатын!
Қақырата
Соққан кезде оқыстан,
Талай тұмсық
Еденменен шоқысқан,
Арқанынан
Ұшып кетіп рингтің
Біржолата кеткен де бар,
Бокстан!
Атақ-даңқы
Жапонда да шыңға асты,
Жанкүйерін
Джеймстің мұң басты,
Қай раундта
Тастар екен талдырып,
Темір Тайсон
Байғұс Бастер Дугласты!
Жиырма төртте
Жанып тұрған жас пері,
Бұйым көрмес
Отыздағы Бастерді,
Бас терісін
Сыпырамыз оның деп,
Қиқулайды
Жанындағы әскері!
«Бұл айқаста
Іздегенім табам ба?
Қапы кетіп,
Қалам ба әлде табанда?!»
Деп толғанды
Тау тұлғалы Джеймс,
Енді қайтсін...
Жан керек қой оған да!
«Қорқынышқа
Бой алдырып, құр тоңба!»
Айтуға оңай,
Жеңбес пе еді жұрт онда,
Батыр болсаң
Шайқасып көр Тайсонмен,
Тура қарап
Соққысына бір тонна!
Жекпе-жекке
Келсін дүлей, келсін дөй,
Бір де бірін
Өзіменен теңсінбей,
Араздасып
Ұстазбен де ақылгөй,
Ат құйрығын кесіп еді
Менсінбей.
Жарқ-жұрқ етіп,
Көзді жасқап жасындай,
Сарт-сұрт соғып,
Аққан селдің тасындай,
Кім болса да
Шығаратын быт-шытын,
Ары кетсе
Бес раундтан асырмай!
А дегеннен
Қуырмақ боп апшысын,
Жұмсап бақты
Соққылардың қаттысын,
Бірақ Бастер ығар емес,
О ғажап,
Беріп жатыр
Жауаптың дәл, нақтысын!
Елестетіп
Арқыраған айғырды,
Сақылдатып,
Соққыларын сай қылды,
Пергілесіп
Сегіз раунд қаймықпай,
Тайсоныңды
Көрер емес тай ғұрлы!
Тайсон қайнап,
Есіне алып бапкерді,
Төкті бүгін
Көк терді де, ақ терді,
Сарт еткізіп
Сегізінші раундта,
Бүк түсірді
Апперкотпен Бастерді!
Құлап барып,
Жерді тіреп бөгелді,
Күйінгеннен
Салып қалды еденді,
Түтігіп тұр
Демін алып дауылдай,
Темір Тайсон,
Деп: «Түрегел, бол енді!»
Тұрды Бастер
Сүйретіліп орнынан,
Бірақ үрей
Байқалмайды пормынан,
Қорғанды кеп,
Біржолата құртпақ боп,
Ұрса Тайсон
Оңынан да солынан!
Төгілсе де тұла бойдан
Тер деген,
Есін жиып,
Бастер тағы өрлеген,
Шаршағаны байқалады
Тайсонның,
Тоғыз раунд
Төбелесіп көрмеген!
Оныншыда
Бітетіндей жекпе-жек,
Тым асқақтап,
Бетіңменен кетпе деп.
Сартылдатып
Соғады кеп Тайсонды,
Арқаланып,
Үсті-үстіне төкпелеп!
«Текке кетпен,
Жекпе-жекке текке кеп,
Жерге бір түс,
Қарай бермей көкке көп!»
Періп- періп жібергенде
Иектен,
Еденменен
Келді Тайсон бетпе-бет!
Ай әлемнің
Айран асыр ақылы,
Бас шайқады
Алысы да жақыны,
Дүниені
Дірілдеткен дүлейді,
Момын Дуглас
Ұрып жықты ақыры!
Құрбандары
Бір елестеп көзіне,
Жұдырықтың
Қаталдығын сезіне,
Дойман қара,
Допша қаққан талайды,
Ойран болып,
Домалады өзі де!
Түсіне алмас
Жай адамның санасы,
Мұның сырын
Ашты кейін сарашы,
Дәл осынау
Жекпе-жектің алдында,
Қайтқан екен
Джеймстің анасы!
Қайтарында
Айтқан екен ұлына:
-Жақын тұрсың,
Атақ –даңқтың шыңына,
Тарт, тікелей,
Тайқып кетпей Тайсоннан,
Мақсат осы,
Басқа жаққа бұрылма!
Қалып келдің
Қалқасында талайдың,
Бірақ алға
Зор үмітпен қараймын,
Арман болған
Чемпиондық атақты
Сенің жеңіп
Алғаныңды қалаймын!
Маған сонша
Керек осы жеңісің,
Бәлкім, соңғы,
Сенен көрер жемісім,
Сүйетінің
Рас болса анаңды,
Балам, ертең,
Жеңіп шықшы мен үшін!
Өмір, өлім,
Ойлап көрсең, тегін бе,
Өліп кетсем,
Бұл айқастан шегінбе,
Менің рухым
Бірге болар сенімен,
Желеп-жебеп,
Қолдап тұрам көгіңде!..
Амал таппай
Тура келген өлімге,
Көзінде жас,
Ана сөзі көңілде,
Қырқы да өтпей,
Намыс қайрап, ширығып,
Шықты Бастер
Сұмдық жекпе-жегіне!
Жылдамдығы
Кем болмады жай тастан,
Оның жайын
Сұңғылалар байқасқан,
Жан алысып,
Жан беріскен сәттерде,
Ұлын қолдап,
Ана рухы шайқасқан!
Әркімнің де,
Болады бір самғауы,
Күдер үзбе
Күндерден деп, алдағы,
Момын ұлды
Жеңімпаздық биікке
Алып шыққан
Анасының аруағы!

---