Кенгуру

Капитан Кук
Жиһан кезген жасынан,
Жерге келді,
Желек киген жасылдан...
Қалтасына
Салып алған баласын,
Бір қосаяқ
Қарғып өтті қасынан.
Туземдіктен,
Сырға жапқан құлағын,
Капитан Кук
Мұның атын сұрады,
Кенгуру деп,
Кеңірдегін бір сипап,
Абориген
Аң-таң болып тұрады.
Қосаяққа ат қойылды,
Кенгуру,
Көрді халық,
Көңіл қойды,
Көнді ру,
Кенгуруың
Түсінбедім деген сөз,
Кетті солай,
Енді қайда оң бұру!
Неше түрлі
Жан-жануар жаралған,
Дүниені
Еркін жайлап таралған,
Арасында
Бір керемет кенгуру,
Австралия
Символы боп саналған!
Оңай болмас,
Ақыл-ойға қондыру,
Табиғатты мүмкін емес,
Жасандыға жеңдіру,
Қалтасына толтырып ап,
Баласын,
Кең аралдан
Кең әлемге
Қарғып өтті кенгуру!

---