Ұлағатты жол

Серік Негимов – 70

Ұялы көзі,
Ұяңдау өзі, биязы,
Қияға кеткен,
Ғалымдық ой мен қиялы,
Зияны тимей,
Жияды бойға жақсылық,
Құяды нұрын
Риясыз елге зиялы!
Байлығың қанша,
Тағдырлы тарих жолдағы,
Зерделеп, зерттеп,
Қауырсын қалам толғады,
Қазына болып,
Сөреге бүгін тізілді,
Бұрынғы, соңғы
Ғұламалардың томдары.
Қайтармақ болып,
Өткенде кеткен есені,
Көсіліп кетсе,
Кестелі сөздің көсемі,
Тыңдаған топтың
Кернейді толқын кеудесін,
Өрісі кеңіп,
Өресі өрлеп өседі.
Негимов айтса,
Егіліп айтар, төгіліп,
Көрікті сөзге,
Кетеді көңіл бөлініп,
Еркіне көніп,
Көктейді гүлдей көктемгі,
Сере боп қатқан
Көбесі мұздың сөгіліп.
Асылдың алыс,
Бүгінге жеткен сынығы,
Көргенін түйіп,
Түгендеп білгір білігі,
Аяңдай басып,
Биікке беттеп барады,
Ғұламалардың
Үрдісін жалғар бір ұлы!
Ақтарып қағаз,
Атырып талай таңдарды,
Алдында шәкірт,
Ақылман ұстаз толғанды,
Ағыл да тегіл,
Көл-көсір ойлар сілкінтіп,
Оянып сана,
Жас жүрек оты жанған-ды.
Ғылымның орнын
Баса алмас дақпырт, даңғыра,
Жапанның сыры
Жаһанға жетер жаңғыра,
Білімнің нұрын
Төге бер елге қажымай,
Жол ұзақ болып,
Майлана берсін қанжыға!

---