Балама сыр

Өмір мынау,
Қалтарыс жол бұралаң.
Сынақ тірлік, шыңдалсын деп, сынаған.
Көп ішінде ібілістер жүргенде,
Тұра ала ма шалыс баспай бұл адам.
Жақсылыққа жаның үйір, емініп,
Жер құшпаған жауырының, жеңіліп.
Екі қадам алға ұмтылсаң озарсың,
Бір қадам бас, кейде артқа шегініп.
Таниды жұрт тектілікті тегіңнен.
Қал жайыңды түсінемін сенің мен.
Нағыз бақыт жеңістерден тұрмайды,
Шыңдайды өмір пенделерді жеңілген.
Әкең талай сынақтардан сүрінген,
Ренжіген,
Құса тірлік, түңілген.
«Барлық адам бақытты» – деп өзіңе,
Пайғамбардың сөзін айттым бүгін мен.
Өмір күрес,
Арпалыс қой ұққаным.
Талап тастар төбеттердей, жыққанын.
Үгітілген ұндай болма диірменде,
Салып жатса,
Бүтін болып, шық жаным.
Өмір күрес,
Арпалыс қой ұққаным.
Талап тастар төбеттердей, жыққанын.
Үгітілген ұндай болма диірменде,
Салып жатса бүтін болып, шық жаным.
Бұралаңды, өмір жолы, шақырым.
Асықпашы,
Аман жүрші ақырын.
Сенде ерекше қасиет бар, білемін,
Қатарыңнан көп ілгері ақылың.
Тән ауырса табамын ғой бір емін.
Жан ауырса қалай өмір сүремін?
Әке ақылы,
Құлақ түрші, ұлы үшін,
Керек десең жұлып берер жүрегін.
Болар бала жастайынан қамданар.
Болмас бала әзәзілге алданар.
Әкең сенің текті жанның ұрпағы,
Батыр, билік, әулиелік қанда бар.
Бауырмалсың,
Кең ғой ұлым жүрегің.
Бір Алладан саулығыңды тіледім.
Анаң текті,
Долы қатын туған жоқ,
Түріп алып шығатұғын білегін.
Жаға жыртып, жексұрын боп дауласып,
Арманға адам жетпейді ұлым, жауласып.
Төле бабаң әділетті шешіммен,
Айқаспай -ақ шешкен талай дау басын.
Қамқор болсаң жұрт соңыңнан ереді.
Зейін қояр шешіміңе келелі.
Күйе жақса кешіріммен қарай сал,
Алла оның өз жазасын береді.
Қоян үркер қиып түсер қамыстан.
Түсінемін,
Ерлер өлген намыстан.
Түлкі тірлік арбауынан мерт болған,
Ертегіде, аң патшасы арыстан.
Тірлігіңе әкең бүгін алаңды,
Сілкіп алшы,
Сілкіп алшы санаңды.
Заман басқа,
Адам басқа қарағым,
Білімсізге жарық дүние қараңғы.
Пенделерге ашуланба, кектенбе.
Кегін алып арманға адам жеткен бе?!
Абыройым сонда ғана тасады,
Азамат бол,
Уәде етіп, серт бер де.