Мен туған жер

Мен туған жердің таулары
Аласармайтын нар бәрі.
Сондықтан болар — арманым
Биікке ғана самғады.
Мен туған жердің орманы,
Әркімнің сая, қорғаны.
Бұл жақты аңсап жүр ме екен,
Құс, жануарлар тордағы.
Мен туған жердің көлдері,
Жатады жаймен тербеліп.
Тұрпаты сондай тамаша,
Нанбасаң, өзің кел көріп.
Мен туған жерде өзендер –
Тоқтамай аққан ежелден.
Суы да таза. Өйткені
Ақ қардың нәрін көп емген.
Мен туған жердің ауасын
Демалсаң – рахат табасың.
Табасың және дертіңнің
Жаныңа жайлы дауасын.
Мен туған жерде көк аспан
Шексіздікпенен таласқан.
Бұлттары кейде түнерсе,
Соның өзі де жарасқан.
Мен туған жердің түндері,
Жұлдыз боп, Ай боп күледі.
Дамылдап жатқан тірлікті
Аймалап самал сүйеді.
Мен туған жердің таңы да
Шапағат сыйлар жаныңа.
Күнім де сондай сәулелі,
Жылуын жайған маңына.
Мен туған жерді бәрібір
Аймалай бермек кәрі Күн.
Бәріне мұнда жетеді
Алланың берген жарығы.

---