Май ұраны

Май ұраны, көгерсін жер, көгерсін!
Жасыл жібек өсімдікке бөленсін.
Жұпарлы жер, жансыздарға жан беріп,
Әмір сүріп, қыбырласын, кенелсін.
Сайрасын құс, жайнасын дөң, күлсін күн,
Оттай шалқып көзді тартып шықсын гүл.
Бұлақ ақсын, бұлаң қақсын, тауларды
Сағым бөлеп, бұп-буалдыр бассын нұр.
Толқысын көл, жасыл құрақ жайқалсын.
Ақ үкісі бұлғалаңдап шайқалсын.
Жасыл бүлге үстін жауып ағаштың,
Жас бұтақтар бұралаңдап жайқалсын.
Бұзау, қозы, құлын, бота, лақтар
Салсын асыр, жаңа шыққан құрақтар.
Май асасын, бір жасасын ешкі, қой,
Сиыр, бие, түйе — аққан бұлақтар.
Еккен егін самал толқып ырғалсын,
Қара топырақ жап-жасыл боп сырлансын,
Қоңыр бұлттан маржан жан,быр сорғалап,
Күркіреп күн, егілген жер дымдансын.
Бұрқ-бұрқ етіп гуілдесін заводтар,
Зырылдатсын доңғалақты алыптар,
Алтын, күміс, мыс пен жездер қазылып,
Жылтылдасын шахталарда жарықтар.
Май ұраны жердің жүзін күңірентсін,
Еңбекші тап, тап намысын үдетсін!
Дүңкілдетіп көтерсін шу, күрессін,
Жердің шарын СССР дай түлетсін!

---