Мазасыз түн

Қиналдың ба көзден жас ыршығандай,
Құшағында бақыттың тұншыға алмай.
Тым өзімшіл жүрегім мына менің,
Құндағынан қойды ғой бір шығармай.

Жеңілдің бе ештеңе өндіре алмай,
Амал ойлап табасың енді қандай?
Кеудеңді қарып түскен бір тал шоқты,
Лаулата алмай болмаса сөндіре алмай.

Керек те жоқ батылдық шеп бұзардай,
Қаталдық та керек жоқ кек тұнардай.
Аялауың тым шектен асып кетіп,
Сезіміңді қалғансың жеткізе алмай.

Бермейді өмір мүмкіндік бір ұтардай,
Сен де мені, мен сені жылыта алмай.
Қоңырау ғып тағып ап әр сәтіңе,
Жүргеніңді қайтемін ұмыта алмай.

Сені жазам, бітпеген тапсырмамдай,
Біргесің шашқа желім жапсырғандай.
Сені ойламай бір тыныш ұйықтау үшін,
Орындайын бұйрықты тақсыр қандай?!

---