Жер астынан табылған теңіз

Аспанында қалқып ұшқан жас қыран,
Аспанында қалқып ұшқан жастық ән,
Шалқар дария табылыпты бір теңіз,
Мен шыр етіп туған жердің астынан.
Жаңалықтар әр таңменен жетер көп,
Шабытымның жануы үшін оты өрлеп.
Бұл теңізді сүймей қайтіп тұра алам,
Шаңқылдаған шағаласыз екен деп?
Тұңғиықтан теңіз үні жетер кеп,
Өткен едім осы өңірді мекендеп.
Қалай үнсіз қалам, жұлдыз суретін
Ағысында билетпейді екен деп.
Табиғаттың мінезіндей құбылған,
Ақ дауыл жоқ толқындарын қуырған.
Ұйқыдағы теңіз тұрып келеді
Жер бетіне шығып темір құбырдан...
Бұл құбылыс, түсін, мейлің, түсінбе,
Өңің түгіл көре алмайтын түсінде,
Көз алдыма келер жұмбақ адамдай,
Бар асылын сақтап келген ішінде...
Өлшемі жоқ су қазына, телегей,
Қалай үнсіз қалам оны елемей?
Көктеп тұрған көк теңіздің үстінде
Туған жерім тербеледі кемедей.
Сол кемеден ғажайыптар көрем мен,
Өмірімнен, биік тұрған өремнен.
Жер астынан табылған бір теңіздей,
Жырым менің көзін ашсын тереңнен.

---