Елемей қарашаның қарсылығын

Елемей қарашаның қарсылығын,
Сен менің тамызым боп қалшы, күнім.
Күзгі бақ түкпірінде қалып қойған
Күндерді жапырақтан аршы бүгін.
Кезім-ай, өзіңді ойлап өксімеген,
Тастаған мұңдарымды ескі деген.
Сап-сары гүлдер құсап тауда терген
Күндері қыркүйектің көшті менен.
Ай өтті бұрқыратып жалбызын ап,
Тамызым жүрегімде қалды жылап.
Өкініш бара жатыр өксіп алып,
Уақытқа сары гүлін алғызып ап.

---