Белгісіз жол

Ой тоқтатып қарамай айналаға
Барамыз ба, лағып айдалаға?
Біз таңдаған мына жол
Екеуімізді
Алып кетіп барады қайда ғана?..
Ғажап тірлік
Кімдерге ұнамасын?
Сол тірлікте сан рет сыналасың.
Екеуіміз де білмейміз,
Алдымыздан
Тағдыр қандай тосып тұр сыбағасын?..
Құлаймыз ба біріміз шалыс басып,
Өтеміз бе мәңгіге қол ұстасып?
Бәрі жұмбақ...
Қинайды белгісіздік,
Ұстатпайды, ақ арман алып қашып.
Қысқа ғұмыр келмейді айналымға,
Тегершігі уақыттың айналуда.
Белгісіздік батырып тереңіне,
Мұрша бермей келеді ойлануға.
Қорытпайды ештеңе құйын-басым,
Бір шешімге келу де қиын ба шын?
Сенің осы сезімің қандай сезім,
Түк түсінсем,
Құдайым,
Бұйырмасын?!

---