Күлімде деп қинама

(аударма)

Даңқ күтпе -
ұрыстардан қалған жара сыздатуда
жанымды.
Даңқ күтпе –
қарапайым солдатпын мен,
Адамзаттың солдатымын кәдімгі.
Қошеметтер жарасады қолбасшыға
дарынды.
Менің даңқым –
азаптардан аман шығып
жеткенім бұл ғасырға,
күлкім менің -
көзден аққан жасымда,
күлімдемей жүресің деп жазғырма,
даңқ күтпе,
құпия сыр бар мұнда.
Халық үшін
жол салатын тыңдарда,
шөл дала мен құмдарға,
гүлдесін деп жер беті
адамдардың қатал келер келбеті.
Сарп етіп
бойдағы күш, сананы,
бір мақсатқа арналатын бар әні
адамдардың мұңды келер жанары.
Төбесінде
жеңіс туы желбіреген белестің
қошеметке ораған жоқ мені ешкім,
себебі мен әзірге
ұлы адамдар санатында емеспін.
Мен өмірде таппай жүрмін өзімді,
бойға жиып төзімді.
Бірақ қара ормандар
соқпақтарды жасырады бойына,
ал олармен
мен жүруге тиіспін.
Соқпақтармен жүруді өзім қаладым,
мен оларды табамын.
Сонда өзің айтқаныңдай мен саған
жапырағы арасынан пальманың:
жайраң қағып жанарым,
шаттық шашып қабағым,
сонда өзің айтқаныңдай мен саған
күлімдеймін, қарағым.

АГОСТИНЬО НЕТО

---