Қызығу

Үлгілі әке, басшы, жар –
сендей болуға жас құмар.
Майлы қасықтай мәніңе
жабыса алмайды ащы зар.
Майланған адам бас сұғар
тесік біткеннің бәріне:
ұнатады сені басшылар,
ұнайсың жасқа, кәріге.
Тіл қатсаң болды – тас сынар –
жетпей жүр саған тағы не?
Жақсы десе дөкей жақсылар,
сол ғана тірлік мәні ме?
Болса да кезім бақ сынар,
бара алмай жүрмін әріге.
Ерсем-ау заман әніне,
үлгі етер сенсің хас шынар.
Қырсықтар сіңген тәніме
ақыл сіңбейді, тас шығар?!
Құлқым жоқ жағар, жақсы ұғар,
сандалып жүрмін әлі де.
1990

---