Тақ маңы

Бұл заманда билікті бақ деп білер,
шын бақыттың тұғыры тақ деп білер.
Айналасы жарамсақ тәуелділер,
ақ машина ат болар баптап мінер.
Тыныш әлем – тақ маңы – мақсатты жер,
еңселі емен есіктен асқақ кірер.
Тақ сөйлесе, иіліп,
тақ езуін
тарта қалса, бұл байғұс сақ-сақ күлер.
Бақ-дәулеттің сорпасы майлы келер,
қуаты мол Күн менен Айды бөгер.
Көзі шелді, жайы жоқ өзгелердің
басындағы қасірет-қайғыны елер.
Кіруге асық басшыға жарықтық ел,
бәрі иіліп қабағын бағып кірер.
Май жүректе лүпіл жоқ – кімнің адал,
кімнің арам екенін танып білер.
Биліктіде дос та көп, айран да көп,
соңын ойлап үңілмес жайларға көп.
Кісілігін, кімнің кім екенін де
біледі адам бастан бақ тайғанда тек.
1991

---