Баллада

(Байроннан)

Мекендеп Бургос жолын жүр деседі
бір сопы дара, тағы.
Күбірлеп тек құдаймен тілдеседі
еске алып садақаны.
Маған деген тағдырдың
Бар сыйлығы бар мұнда.
Жазған сөзің бар онда,
Ұрлап алдым мен өзім.
Сол қағаздың жолында
Бар азапқа төземін.
* * *
Бітті бәрі! Ештеңе жоқ баянды,
Қоштасатын күн де бүгін таянды.
Азабы мол ажырасар келді сәт,
Көңілімде қасірет те қат-қабат!
Шіркін, алғаш мен кезіккен кезімде,
Түскенде көз сенің нұрлы көзіңе,
Байқамаппын күннің былай өтерін,
Ажырасар азапты шақ жетерін.
Бәрі бітті! Сенің әсем даусыңды
Естіп қуат алатын күн таусылды.
Енді жұрттан бөлек кетіп, кеш қалам,
Сөйтіп сені жылаймын да... еске алам.
***
Қош бол енді! Осы айтылған сөз енді,
Мына менің жүрегімді езеді. –
Қош бол! - деген азабы мол алты әріп,
Мен байқұстың өртеп өтті-ау өзегін!
Мөлдір көздер мазамды алып күрсіндім,
Айрылысарға жаралдық па... білсін кім?