Көркемөнерпаздар фестивалі

Дүбiрлi шулы көктемге
көк айдын бейне сахна.
Қарамай артқа, өткенге
келiңдер тездеп,
шақырам.
Қараймын көлге жыр аулап
құлаққа құйып үндерiн.
Тырналар жеттi тыраулап
аспанның ансамбльдерi.
Сұлу бiр мұңлы қайғымдай
кеудемдi тұтас ән етiп,
қос аққу жүрдi айдында
орындап көктем балетiн.
Бұрылыс жасап мың қилы
жақындап келiп жағаға
шаңқылдап көлге сүңгидi
шабақты iлiп шағала.
Көзiңдi алмай көлден бiр
тартасың басты қайтудан.
Көлiмнiң үстi ән мен жыр
көлiмнiң үстi той-думан.
Әуез боп, ән боп құбылған
тыңдап көр ғажап саздарды –
көк айдын
көлдiң бетiнде
құстардан сансыз құрылған
көркемөнерпаздардың
фестивалi өтуде!