Сүйіліш баба рухына

Сүйіліш баба!
Сен ғасырлардың
Ар жағындасың.
Біз бер жағындамыз.
С ен тау жағындасың.
Сенен төмен болсақ та
Төменшіктеп кеткен жоқпыз
Біз де өр жағындамыз.
Сүйіліш баба!
Бүкіл ұрпақтарың болып
Өзіңе сүйініп тұрмыз.
Өзіңнен таралған
Бүкіл тамыр- талшықтарың
Өзендердей болып құйылып
Жиылып тұрмыз.
Алдымен Алла тағалаға,
Сонан кейін
Қожа Ахмет Яссауи мен
Өзіңе сыйынып тұрмыз.
Алтын құтың қамбадай
Құтты екен.
Белің емендей
Мықты екен.
Қаратау мен
Дарияның бойына
Төгілген төлдерің
Бірі құлжаға,
Бірі тұлпарға,
Бірі сұңқарға айналды.
Олардың бірі айбарлы,
Бірі айдарлы.
Олардың ішінде
Ормандарды жапырардай
Дауылы да бар.
Сол дауылың
Итеріп құлата алмайтын
Ауыры да бар.
Теңіздердің толқындары
Жиылып келіп
Қозғалта алмайтын
Жартасы бар.
Құдай- ау,
Сенің ұрпақтарыңның
Ең жаманының да
Құтырып кететін арқасы бар.
Есек мініп жүрген
Сол жаманыңың өзі
Арғымақ мінген азаматтың
Сәлемін
Шіреніп тұрып
Зорға алады.
Сол жаманыңның өзінен
Талай мықты қорғанады.
Сен еліңді қорғадың
Жеріңді қорғадың.
Жердің жеті қабатына
Жеткен тамырың
Асыл болды.
Намысың көкте
Қып- қызыл болып шатырлаған
Жасын болды.
Ақырып келгендерді
Атынан қалпақтай ұшырып
Мықшитып жібердің.
Түндей боп түнеріп келгендерді
Қырандай шүйіліп
Бұтаның тасасына тығылған
Қояндай етіп
Бүкшитіп жібердің.
Бүгінде
Сенің ұрпақтарың
Өзің аңсаған
Тәуелсіз қазақ елінің
Азаматтары.
Өрге салса төске озған
Қазан аттары!
Қазаққа
Өпіремдеп ұмтылғандардың
Өкпе, қолқасын қосып
Жұлып аламыз.
Сенің басыңда тұрып
Өзіңнен кескекті
Рух аламыз.
Сүйіліш баба!
Аруғың бізді
Қолдай берсін.
Бәле- жаладан
Қорғай берсін!
Әумин!