Жалбарыну

Бүкіл
Мұсылман қауымындай
Біздің де
Қасиетті сөзіміз — Алла,
Қасиетті кітабымыз — Құран.
Сондықтан да мен
Ләйлаһа илалла,
Мұхамедін Расул Алла,
Ләйлаһа илалла,
Мұхамедін Расул Алла,
Ләйлаһа илалла,
Мұхамедін Расул Алла —
Осылай деп жатам.
Осылай деп тұрам.
Содан кейін
Мына дүниенің
Кеспірсіз
Бет-бейнесін көріп
Жұмыр басымды
Тауға да ұрам,
Жарға да ұрам.
Е, Алла тағала,
Азап пен мехнатты
Көп көрген
Елімнің рухын
Асқақтата көр деп
Жалбарынам.
Мына дүние
Дауылды күнгі
Қара бұлттардай
Төңкеріліп, аударылуда.
Төңкеріліп, аударылған
Сол бір бұлттарға
Менің ел-жұртым
Жабысып жан бағуда.
Е, Алла тағала,
Жан бағып
Жанталасқан еліме
Қайрат пен қуат
Бере гөр;
Шуағыңа шомылдырып,
Аппақ бұлтыңа орап
Қайырым мен
Мейіріміңді төге гөр!
Е, Алла тағала,
Тілегімді қабыл ет!

---