Жүрегіммен жыр жаздым ғұмыр жайлы,

Шаужайына жабысып қысыр күннің,
Өктем уақыт басады мысын мыңның.
Сырғып өткен сынаптай жастық шақтың,
Қайта айналып келмейтін тұсын білдім.
Қызарақтап батады күн еңкейіп,
Сұлу қыздай көрсеткен ерке кейіп.
Көктемінде көңлімнің өмірім бар,
Менен басқа кеткендей ел есейіп.
Жылжығанда жылдар мен айлар аттап,
Естеліктер өтеді тайғанақтап.
Жүрегіммен жыр жаздым ғұмыр жайлы,
Мақпал түнде тұрғанда Ай қонақтап.
Заман біліп, көшеді ғасыр ұғып,
Еңлік көңіл кетеді басын бұғып.
Өткен көшпен ілесіп қырқаларда,
Бара жатыр жастығым жасырынып...

---