Жүректің үні

Түсіңе түнде енбесем,
Ойыңа күндіз келмесем,
Телефонымды термесең,
Ұмытқандығың…

Сағынышымды сезбесең,
Қиялдап әлем кезбесең,
Жүрекке құлақ түрмесең,
Суығандығың…

Қызықты күнге шөлдесең,
Қызғанышыңмен күндесең,
Жаныңның емін білмесең,
Кіріптарлығың…

Күйбеңге түсіп көнбесең,
Қайшылықтарға төзбесең,
Құшаққа енші ендеше
Сырып барлығын…

Келсеңші енді - кел десем,
Мен үшін Күн де Жер де сен.
Елеспен күнде тілдессем,
Бұл құштарлығым…

Сезімді мынау сезбесең,
Өз жараңды өзің емдесең,
Адалдығыма сенбесең,
Ұтылады кім?

Үмітімменен үндесем.
Елесіңменен жүздесем.
Шын көңіліңмен сүймесең,
Жауап бер бүгін…

Біз үшін тағдыр өзгеше.
Махаббат әлі өлмесе,
Сезімнің оты сөнбесе,
Қуат бер күнім…
Ержан Қабышұлы / Bura-Naiman

---