Ертістің қалың тұманы

Ертістің қалың тұманы
қашанда таңын буады.
Жасырар бәлкім бар шығар -
құпия тылсым сырлары?

Ертістің қалың тұманы
елітіп, арбап тұрғаны.
Елес пен пері бар шығар?
Әр-қилы дыбыс шығады.

Ертістің қалың тұманын -
қай ақын, қашан жырлады?
Қалайын елеп оны бір,
Буалтып будап тұрғаны.

Асаудай терлеп буланып,
Бәйгеден келген пырағы,
Боз кілем алып жүлдеге
Көпір тұр тұман оранып.

Шығыстан ескен самалы
тұманды қуып барады.
Ағады қарсы ағынға
желкенді кеме аралы.

Бесіктей тербеп қаланы
үнсіз ән Ертіс салғаны.
Маужырап тұрып ұйқыдан,
керілер терек талдары.

Тастары моншақ бағалы
жағадан жымың қағады.
Дидарлы күннің лебімен
Ертістің тұнар тұманы.

Күз аттап келсе шамалы,
Келгенше көктем оралы.
Иықтан түспес Ертістің
Түбітті тор орамалы.
Ержан Қабышұлы

---