Небір қазақ бар

Күйін білмей, шашылатын қазақ бар,
Бай болуға асығатын қазақ бар.
Шашылатын-асығатын қазақты,
Берешекке батыратын қазақ бар.

Бұғып келіп, шалқаятын қазақ бар,
Қалтасы бос, талтаятын қазақ бар.
Шалқаятын-талтаятын қазаққа,
Жағымданып-жалпаятын қазақ бар.

Пара беріп, құтылатын қазақ бар,
Пара алып, құтыратын қазақ бар.
Екі арада мақсатына жете алмай,
Адал істен ұтылатын қазақ бар.

Дым көрмеген, дым білмейтін, қазақ бар,
Естіп тұрып, үндемейтін қазақ бар,
Шіріп жатқан, асқынатын жараны,
Дер кезінде емдемейтін қазақ бар.

Өз тілінде сөйлемейтін қазақ бар,
Өз тілінде ойламайтын қазақ бар.
Тіл үйреніп ел ағасы атанған,
Нәсілі өзге, рухы қазақ - қазақ па?

Қазақ ғұмыр бір азапсыз жасап па,
Жеткен едік қан-майданда азатқа.
Озат елдің қатарына ұмтылған,
Қазақ болсаң қалма бауыр мазаққа.
Ержан Қабышұлы

---