"ӨЛЕҢ" дейді біреулер

Күннен күнә іздеткіш, Айдан күдік,
Қайдан жұққан мінез — бүл?
Қай заңдылық?
... өмір сүріп жүрмін сол әдетімше:
Майдан емес өмірді майдан қылып,

Біреулерге айтуға бата алмаған
айтарымды өлеңге айналдырып
жүрген бетім (дәм болсын) ақынға ұсап,
шатпақтап тек парақты ойран қылып...

Расы, әйтеуір, шимайым
қоймасы анық
Анау дүлей ақынды ойландырып,
болмаса тек жүргенім сол арқылы
шер тарқатып бойымнан, қайғы алдырып.

Алты аланың ішінде құлаға ұсап
көңіл — өгей, өліара тұрады шақ,
Өмір — тәтті, арманым — аппақ қана,
Еңсем, бірақ, тым жиі құлағыш-ақ.

Білемін ғой, өмірлік майдан жайлы
қай "майдангер" қаймығып ойланбайды?!
Сұрайтындар сонда да жетіп жатыр
"Жас басыңа қонды, — деп, — қайдан қайғы?"

Сыр білдірмей ешкімге, Айдан әрі
ұшып кеткім келеді
жәй ғана,
Бұл
жүрегімде менің-ақ жалғыз ғана
бітпегендей көрініп майдан әлі.

Бөле алмайтын жерге дым тынысымды ой,
Ұшар ма едім мен өзім, жыр ұшырмай...
... "өлең" дейді біреулер,
Қайдағы өлең?!
Менің ол, тек майдандық қылышым ғой...

Қайрат Тілекқабылұлы