Бүкпесіз – Ержан Қабышұлы Қабанбай

Бүкпесіз

Мен сендерді сүйемін,
Барлығыңды кешірдім.
Сендер мені кешіргің,
Мен де өкпемді өшірдім.
Өкпе деген қара мұз,
Ұйып қалар арамыз.
Сүйіп келіп өмірден,
Кешпей қайда барамыз?
Ешкім мені сөкпесін,
Мен өмірден өткесін.
Кешірімсіз бір өкпем,
Гүл боп жерде көктесін.
Мен сүйемін бәріңді,
Сүйдім жас пен кәріңді.
Жан сыйлауға даяр ем,
Бағаламай әлімді.
Сүйдім дос деп, дұшпан деп,
Бөліп-жармай құшқам көп.
Кешірімсіз ешкім де,
Ештеңе де ұтқан жоқ.
Болмаңдаршы өкпешіл,
Болмашыға дерт-есіл.
Сүйіп өтем бәріңді,
Сүймеді деп сөкпесін.