Келіншек тау

Келіншек тау
Май айында көрікті.
Бурыл бұлттан
Киіп алған бөрікті.
Енесіне
Ентелеген ботадай,
Етегіне
Тас төбелер шөгіпті.
Тым еріншек
Бір келіншек
Ой аулап.
Көшті тартып
Жылжиды жай баяулап.
Іркіс-тіркіс
Жатыр іздер жосылып,
Қанды асуын
Баяғының баяндап.
Қарайтұғын
Суретіне бас алмай.
Қара тастар,
Ала тастар
Жасаудай.
Қара нарлар қатып қалған секілді
Қаратаудың қабағынан аса алмай.
Шумағындай шерге толған өлеңнің,
Аса алмаған арманындай ол елдің.
Тас ғасырдың тағы адамын орнатып,
Тастағандай қолдары бір шебердің.
Көңіл шіркін
Сұлулыққа тым ынтық.
Қарайды оған
Қиял көзін жүгіртіп.
Бұлт ойнатып,
Бұлдыратып
Нүктедей,
Тағы тасқа
Жан береді тірілтіп.
Тіршіліктің
Бойын шарпып сәулесі.
Тағы қайта
Қозғалады тау көші.
Тағы қайта
Жоғалады ғайып боп,
Таусылмайды
Ертелі-кеш әуресі.
Бұл тау жайлы
Толы аңызға ел іші
Келіншектің
Алтын дейді кебісі.
Бір жартасқа
Қалған дейді ілініп,
Аруанадан ауып түсіп келісі.
Бір кездерде
Ермек еткен ел тегі
Ол аңыздар —
Кәрі аңыздар —
Ертегі.
Көз алдымнан
Кетпейді бір суреті.
Сол сурет —
Барлығының көркемі.
Сол баяғы
Аңыз болған асуда,
Бұйра-бұйра
Көк бұлтының қасында.
Бір келіншек
Жас қозыны көтеріп,
Тұрды күліп Келіншек тау басында.
Тау басына
Ескерткіштей орнаған,
Өлең құйып
Әсер етті ол маған.
Мың есе артық
Көрінді сол келіншек,
Келіншектен
Өмірде еш болмаған.
* * *
Шымылдығын ысырып
Көрінсін бір түн жүзі.
Жарық сәуле түсіріп,
Көтеріл көк жұлдызы.
Төрде сонау ал тұрақ
Күзетте боп күт таңды.
Сәулеңменен жарқырат,
Бұлдыраған бұлттарды.

---