Петергоф

Петергоф.
Фонтандар —
Биікке құстай шарқ ұрған.
Петергоф.
Фонтандар — Кемпірқосақ тартылған.
Фонтан —
Атқан отты сел
Көктемгі аспан бұлтындай.
Фонтан жауған көк нөсер
Күндіз-түні бір тынбай.
Фонтан — моншақ сауылдап,
Гранитке жабысқан.
Фонтан — жерден жалындап,
Ракетадай жаңа ұшқан.
Сол фонтандар ішінде
Самсон батыр тұр бөлек.
Оның қайрат күшіне
Жасай алар кім бөгет?!
Арыстаннан шошымай
Жатыр жұмсап білекті.
Петр бір кез осылай
Жұмарлаған шведті.

---