Әр үйде бір-бір ленин – Сырбай Мәуленов

Шығын боп жүрген шетінеп,
Кеудесі толы зар-мұңға.
Қазақтың жері — жетімек,
Лениннің жатыр алдында.
Ұрады шалқып от лебі,
Шаңырқап түсте жел ыстық.
Мал оты — қырдың көкпегі,
Жоқ одан басқа өріс түк.
Қан-сөлсіз қатып безеріп,
Шілдеде жанған шөл тамыз.
Жалақ боп ерні кезеріп,
Жалайды тілін сортаң тұз.
Айтады желдер азынап,
Бабаның тарлан аңызын.
Ленин жатыр жазып ап,
Даланың арман арызын.
Қазақтың кезіп қиырын,
Ленин ойы шарқ ұрды.
Қолымен тіреп бүйірін,
Маңдайын ұстап сәл тұрды.
Ленин ойы төкті ақ сел,
Далаға қанат жайды өмір.
Гүл болып толқып бетпақ шөл,
Жұлдыз боп жанды Байқоңыр.
Әр үйде бір-бір Ленин,
Ленинсіз қазақ төрі жоқ.
Ленинсіз қазақ елі жоқ,
Ленинсіз қазақ жері жоқ.
Әр үйде бір-бір Ленин.