КӨРШІЛЕР

Бір шатырдың астында тұрамыз, ә, аға, біз...
Тату көрші болайық, биік сонда-бағамыз;

Көрші тату болғанда, қажет пе екен шекара
Қабырғаны тесейік-төте болсын екі ара

Алдыңғының ізімен кейінгілер жүрмей ме-
Жерді қалың қар басты, күреуді ағам білмей ме?!.

Таң бозынан тұрасыз, жарамайды мұныңыз
Тәтті ұйқысын бұзғанды жақтырмайды ініңіз

Қызық көп қой жастарға тойға кеттік тағы біз
Біз келгенше жылатпай кішкене ұлды бағыңыз

Қыс та өтер аязды, көктем келіп шуақты
Жер өңдейік бірігіп, аямай күш-қуатты:

Баптау, күту, суару-міндет болсын сіздерге
Ал, өнімді жинауды тапсырыңыз біздерге

Ми айналып кетеді, үйдің қамын ойласам
Құнажынды қолға алып.., сіздің шөпке байласам...

Бөліп-жарып қайтеміз, оны да сіз сауыңыз-
Сүтті әкеліп берсеңіз, болмайды еш дауымыз

Болсын тәңір ақысы-хақымыздың қаншасы...
Сенбі күні ағамның дайын тұрсын моншасы

Қиналмаңыз, ағасы, деп-"Інімді қыздырам"
Артық емес, кем емес-моншадан соң-жүз грамм...

Қайсы бірін айтамын мың сан күйкі тірліктің
Осылай күн кешелік, шырқын бұзбай бірліктің

Көрші інің-тынысың, ентікпегін, ағамыз,
Сіздер алда жүргенде, жайлау-біздің жағамыз;

Ініңізден-оң сәлем, қандай кінә тағасыз-
Мендей қымбат көршіні қайдан, аға, табасыз?!.
.....................................................................................
Мұндай көрші-бауырдан айналмасам, кім болдым?..
Шартын түгел көтердім, дау айтуды мін көрдім

Осы інімнің арқасы-мынаны ұғып өтемін:
Татулықтың негізі- сыйластықта екенін

---