Төбет пен күшік

Иығыңды жауып жылы ішікпен,
Даналықтың бальзамынан ішіп пе ең?!
Ішсең егер — түсінесің,
Қарашы,
Дәу төбетті ойнап жүрген күшікпен.
Бұл төбеттің болмағанмен шатағы,
Бөрілерге әбден аян атағы,
Ал күшікпен ойнағанда өзгеше:
Қуса — қашып,
Жетсе — құлап жатады.
Тұра салып және тағы қашады.
Қашады да
Жолдың шаңын шашады.
Шашады да
Өп-өтірік құлайды.
Құлайды да
Аузын ғана ашады.
Машықтанып күшік айла-амалға,
Ұмтылады,
Ұмтылады тағы алға.
Жұлқылайды көне күпі сияқты
Дәу төбетті «алып Ұрып» көгалға.
Қайбір кезі түсе ме екен есіне,
Бұл төбетке неге керек?
Несіне?
Өзінше әбден «умаждады»
Төбеттің
Ерке күшік шығып алып төсіне.
Кім біледі
Неменен бұл тынады.