Нұрәсила Бәрменбаева (1915 жылы туған) — ақын. Атбасардағы төрт жылдық қазақ мектебін, онан соң комсомол-жастар мектебін бітірген. Жезқазған — Ұлытау өңіріне 1920 жылдардын орта шеніне қарай көшіп келген. 30-жылдардың басында тұтыну кооперация қызметкерлерін даярлайтын Алматыдағы бір жылдық курсты бітіріп, Қарсақбайға оралады. 1933 жылында Қарқаралыға, одан Алматыға ауысады. 1937 жылында күйеуі «халық жауы» болып ұсталған соң елге оралады. Ұлы Отан соғысы жылдарында Жезді өңірінің тұтынушылар одағында меңгеруші болып, халықты майдан үшін еңбекке жұмылдырды. Онын өлендері 1977 жылы республика ақындарының «Шұғыла» жинағында басылды. 1981-82 жылдарында «Ерке бота», «Ана жыры», 1990 жылы «Ана махаббаты» атты жинақтары жеке кітап болып шықты. Соңғы жылдары сазгерлік қырынан танытқан «Озім мен елім», «Сәкен» тәрізді әндері белгілі әншілер Ғалым Мұхамедин мен Мара Есмұхановалардың репертуарларынан берік орын алған.